Քրիստոսի պայծառակերպության կամ, որ նույնն է, Վարդավառի տոնին Հաղպատի վանական համալիրը հյուրընկալել էր բազմաթիվ ուխտավորների՝ Հայաստանի տարբեր մարզերից ու մայրաքաղաքից, և անգամ Վրաստանից: Այսուհետ, ամեն տարի, Վարդավառին ուխտագնացություն կկատարվի Հաղպատ ու կնշվի Հաղպատավանքի կամ Սայաթ-Նովայի օրը: Հաղպատավանքի մայր եկեղեցում մատուցվեց Սուրբ Պատարագ: «Լոռվա ձոր» հայրենակցական միության նախաձեռնած Հաղպատի օրվա տոնակատարություններին աջակցել է ՀՀ Մշակույթի նախարարությունը, Լոռու մարզպետարանը և Հայ Առաքելական եկեղեցու Գուգարաց թեմը: Հաղպատի վանական համալիրի եկեղեցամերձ հրապարակն, այսուհետ, կրելու է աշուղ Սայաթ-Նովայի անունը: Հաղպատեցիներն, ինչպես նաև զբոսաշրջիկները, հնարավորություն կունենան լուսանկարվելու Սայաթ-Նովայի հուշաքարի մոտ, որի բացման արարողությունը տեղի ունեցավ հենց Վարդավառի կամ Հաղպատավանքի օրը: Ուխտավորները հնարավորություն ունեցան մասնակցելու նաև մատաղի արարողությանը: Առաջին անգամ Հաղպատում ու առաջին անգամ նաև Սայաթ-Նովայի անվան հրապարակում ելույթ ունեցավ Թաթուլ Ալթունյանի անվան երգի, պարի պետական անսամբլը: