Մասնագետներն ահազանգում են, որ պլաստմասսան մարդկանց առողջության և շրջակա միջավայրի համար վտանգավոր է թե՛ արտադրության, թե՛ օգտագործման, թե՛ հրկիզման ընթացքում: Դրանց թաղումը նպատակահարմար չէ, քանի որ թունավոր հավելումներն աղտոտում են ստորգետնյա ջրերը: Պլաստմասսայի այրումը համարվում է մարդկությանը և շրջակա միջավայրին հասցվող ամենալուրջ վտանգներից մեկը, քանի որ պլաստմասսայի այրման ժամանակ արտազատվում է վնասաբեր դիօքսին` կայուն օրգանական աղտոտիչների մեջ ամենավտանգավոր նյութը, որը ենթադրվում է` քաղցկեղածին է և կարող է վնասել հորմոնային ու մյուս համակարգերը: Ալավերդու փողոցներում կատարվող ամենօրյա աղբահանությունը քաղաքի մաքրությունը չի ապահովում, քանի որ բնակիչներից շատերը աղբը լցնում են դրա համար չնախատեսված վայրեր£ Պոլիէթիլենային տոպրակներն ու պլասմասսե շշերն իրենց թեթև քաշի պատճառով քամուց ցրվում են ու դառնում ոչ միայն շրջակա միջավայրի աղտոտման պատճառ, այլև կենդանի օրգանիզմներին լրջորեն սպառնացող վտանգ£ Շրջակայքը պլաստիկից մաքրելու ու առողջ միջավայր ունենալու նպատակով Ուրբան կայուն զարգացման հիմնադրամն, Ալավերդու քաղաքապետարանի, ԵԱՀԿ Ալավերդու Օրհուս կենտրոնի, «Վահագնի 21» ու «Երիտասարդ Ալավերդի» հասարակական կազմակերպությունների հետ համատեղ Ալավերդիում իրականացնում է «Հանրային կրթություն հանուն կայուն միջավայրի» ծրագիրը£ Ծրագրի հիմնական նպատակը կենցաղային աղբի տեսակավորումն ու պլաստիկ տարաների վերամշակումն է£ Որպեսզի այդ աշխատանքներն ավելի արդյունավետ կազմակերպվեն քաղաքի 15 աղբամանների կողքին կտեղադրվեն նաև միայն պլաստիկ տարաների համար նախատեսված հատուկ աղբամաններ£ Ծրագրի պատասխանատուները բնակիչներին հորդորում են աղբից առանձնացնել պլաստիկ շշերը, այն լցնել միայն դրա համար նախատեսված աղբաման£ Դրանով շրջակա միջավայրն ավելի մաքուր կդառնա: Իսկ հավաքաված պլաստիկ շշերը կվերամշակվեն Վանաձորում£ Հայաստանում այսպիսի ծրագիր առաջին անգամ իրականացվում է Ալավերդիում: Թափոնների վերամշակման շնորհիվ շրջակա միջավայրը չի աղտոտվի, ավելին` տնտեսական օգուտ կբերի: Նոր աղբարկղերը կտեղադրվեն հուլիսի կեսերից: Հաջողության դեպքում ծրագիրը կներդրվի նաև հանրապետության այլ քաղաքներում: