Մադան թաղամաս տանող ճանապարհին գտնվող մկնդեղի թափոնների գերեզմանոցի էկոլոգիական ռիսկերի բացահայտման ու գնահատման համար «Անահիտ» կանանց աջակցության կենտրոնը ԵԱՀԿ Ալավերդու Օրհուս կենտրոնի հետ համատեղ «Անվտանգ միջավայր» դրամաշնորհային ծրագիր է իրականացնում: Հունիսի 24 - 25-ին մկնդեղի թափոնների գերեզմանոցում ուսումնասիրություններ էին իրականացնում Գիտությունների ազգային ակադեմիայի էկոլոգոնոոսֆերիկ կենտրոնի մասնագետները: Մկնդեղի թափոնների գերեզմանոցից մկնդեղի ու այլ վնասակար նյութերի արտահոսք կա թե ոչ` ցույց կտան երկօրյա հետազոտությունների արդյունքները: Առաջին նմուշարկումն սկսել են մկնդեղի գերեզմանոցի մոտակայքում հավաքված ջրից: Ջուրն անց են կացնում ֆիլտրով, իսկ բուն ուսումնասիրությունը կատարելու են Երևանի իրենց լաբորատորիայում: Նմուշարկվելու են Մադան թաղամասից Դեբեդ գետ թափվող ջրերի ափամերձ տարածքները: Ջրի միջոցով գերեզմանոցից մկնդեղի արտահոսքը նվազեցնելու համար Էկոլոգոնոոսֆերիկ կենտրոնի տնօրեն, ակադեմիկ Արմեն Սաղաթելյանը համարում է, որ գերեզմանոցը հարկավոր է ջրամեկուսացնել: Դրա համար այն պատում են բուսականությամբ և արմատային խիտ համակարգը նվազեցնում է ջրի արտահոսքը: Ակադեմիկ Սաղաթելյանը նկատեց, որ այլ տարածքների համեմատ գերեզմանոցի շրջակայքի բուսականությունն ավելի փթթուն է, ինչը գրավում է կենդանիներին: Սակայն թունավոր նյութերը չեն լուծվում ու ներթափանցելով բույսերի մեջ, օրինակ, կովի կաթի միջոցով հասնում են մարդու օրգանիզմ: Մկնդեղի գերեզմանոցից վնասակար նյութերի արտահոսքի կա, թե` ոչ, պարզ կլինի մոտ 1 ամսից: