Մադան թաղամաս տանող ճանապարհին գտնվող մկնդեղի թափոնների գերեզմանոցի էկոլոգիական ռիսկերի բացահայտման ու գնահատման համար «Անահիտ» կանանց աջակցության կենտրոնի ու ԵԱՀԿ Ալավերդու Օրհուս կենտրոնի համատեղ ջանքերով իրականացվող «Անվտանգ միջավայր» դրամաշնորհային ծրագիրը հնարավոր է նախատեսված 6 ամսից ավելի տևի: ԵԱՀԿ երևանյան գրասենյակը ծրագրի համար 6000 եվրո գումար է հատկացրել, ևս 1000 եվրո ֆինանսական աջակցություն է ցուցաբերել նաև «Մանես» բարեգործական հիմնադրամը: «Անվտանգ միջավայր» ծրագրի ղեկավար Լարիսա Փարեմուզյանն ասում է, որ, ի սկզբանե, չեն կանխատեսել, որ մեծ աշխատանք ու ավելի շատ գումար է անհրաժեշտ ծրագրի իրականացման համար: Այդ իսկ պատճառով հնարավոր է, որ ԵԱՀԿ-ն երկարաձգի ու հավելյալ գումար տրամադրի առաջիկա աշխատանքների համար: Ծրագրով դեռևս մնացել է գնահատել գերեզմանոցի տեխնիկական վիճակն ու սեյսմիկ անվտանգությունը: