Սանահին Սարահարթ թաղամասից էնգելս թափվող կոյուղաջրերի խնդիրն արդեն մի քանի տարի թաղամասի բնակիչները ներկայացնում են բոլոր ընտրություններից առաջ հանդիպման եկող թեկնածուներին: Բնակիչներն ասում են, որ ապրում են անընդհատ վախի մեջ, մտածելով, թե կոյուղաջրերը կխառնվեն խմելու ջրին ու համաճարակի պատճառ կդառնան: Ամռանը ստեղծվող հակասանիտարական պայմանների ու գարշահոտության պատճառով նրանք ամռանը լքում են տները: Թաղամասում մնում են հիմնականում մեծերը: Հայջրմուղկոյուղու Ալավերդու տեղամասի աշխատակիցները փորձում են փոխել Էնգելս թափվող կեղտաջրերի հունը: 1800 մ երկարությամբ ու 500 մմ հաստությամբ ամբողջությամբ խցանված կոյուղագիծը բացելու դեպքում գոնե որոշ չափով հնարավոր է մարդկանցից հեռացնել գարշահոտությունն ու կեղտը,- ասում է Հայջրմուղկոյուղու շահագործման ծառայության պետ Սամվել Սոխակյանը: Ծառայության պետը նշում է, որ հաճախ խցանումների պատճառ են դառնում կոյուղի նետած կովերը, ձիերը ու այլ եղջերավորները: Սակայն, թափվող կեղտաջրերի խնդիրը կլուծվի միայն մաքրման կայանի առկայության դեպքում, որի մասին մոտ 20 տարի խոսվում է, սակայն գումարի բացակայության պատճառով կայանը դեռևս չկա: