Անձրևներից առաջացած սողանքների պատճառով հանրապետությունում բազմաթիվ ճանապարհներ են քանդվել, իսկ որոշ երթուղիներ ժամանակավորապես փակվել էին: Միջպետական ճանապարհի Վանաձոր-Ալավերդի ճանապարհահատվածի 29-րդ կիլոմետրում 10 օր առաջ շինարարական աշխատանքներ սկսվեցին, որոնց պատճառով այս օրերին երթևեկությունը կատարվում էր այլընտրանքային ճանապարհներով: Վանաձոր-Ալավերդի ճանապարհը փակելիս շինարարներն ասացին, որ ՀՀ տրանսպորտի և կապի նախարար Մանուկ Վարդանյանին խոստացել են աշխատանքը 10 օրում ավարտել: Ուղիղ 10 օրից` հուլիսի 2-ին, տեղեկացանք, որ շինարարական աշխատանքները թեև դեռ ընթացքի մեջ են, սակայն ճանապարհի երթևեկությունը վերականգնվել է: Հիշեցնենք, որ Վանաձոր-Ալավերդի միջպետական մայրուղին վերանորոգման աշխատանքների պատճառով հունիսի 22-ից ժամը 11:00-ից փակ էր: Դեբեդ գետի վարարումների հետևանքով ճանապարհը փլվել էր 1 ամիս առաջ: Հավելենք նաև, որ ճանապարհի փակման պատճառով 200-ական դրամով ավելացել էին Ալավերդի-Երևան և Ալավերդի-Վանաձոր երթուղային տաքսիների երթևեկության տոմսի արժեքը: