Նախկինում 5 տարի օգտագործած ջրաչափերը պետք է փոխվեին կամ լաբորատոր զննություն անցնեին: 2008 թվականից օրենքում փոփոխություններ են կատարվել և ջրաչափի օգտագործման ժամկետը երկարաձգվել է ևս 2 տարով: Ջրաչափերը փոխելու կամ լաբորատոր ստուգման տանելու համար Հայջրմուղկոյուղու տեսուչները տնայցեր են կատարում ու նախապես տեղեկացնում բնակիչներին: Եթե բնակիչն, այնուամենայնիվ, որոշում է չփոխել կամ լաբորատոր ստուգման չտանել ջրաչափն, օրենքի սահմաններում պատժվում է: Հայջրմուղկոյուղու Ալավերդու տեղամասի մոտ 4000 բաժանորդ այս տարի ստիպված է լինելու փոխել ջրաչափերը կամ լաբորատոր ստուգման տանել: Ջրաչափերի պիտանելիությունը ստուգում են Վանաձորի հատուկ չափագիտական լաբորատորիայում: Ջրաչափերը համարվում են բնակիչների սեփականությունը և դրանց ստուգման կամ փոխման համար անհրաժեշտ ծախսերը պետք է հոգա հենց բնակիչը: Այսպիսով, ջրաչափը փոխելու համար անհրաժեշտ է մոտ 6000 դրամ, իսկ լաբորատոր քննություն անցկացնելու համար մոտ 3000 դրամ, հաշվի առնելով փորձաքննություն անցնելու ու Ալավերդի -– Վանաձոր երթուղային տաքսու արժեքները: